Mae bywyd wedi bod yn anodd iawn yn ystod y pandemig ac mae’r misoedd diwethaf wedi bod yn rhyfedd iawn i bawb.
Yn y Wallich, rydym wedi gorfod addasu a newid y ffordd rydym yn gweithio er mwyn parhau i gefnogi defnyddwyr ein gwasanaethau yn ystod yr amser anodd hwn.
Yn fwy nag unrhyw beth arall, mae’r pandemig wedi dangos pa mor gydgysylltiedig rydyn ni gyd.
I ddyfynnu’r bardd enwog, John Donne:
“No man is an island, entire of himself”
Rydyn ni gyd angen dibynnu ar ein gilydd a gofalu am ein gilydd. Hyd yn oed wrth i’r cyfyngiadau symud lacio, ni ddylem golli’r ymdeimlad o gymuned rydym wedi’i adeiladu gyda’n gilydd. Dylem barhau i gofleidio’r ‘normal newydd’ hwn, beth bynnag fydd gofynion gwneud hynny.
Mae ein gwasanaethau ledled Cymru wedi gwneud hynny.
Rydym wedi cyflawni pethau gwych trwy gydol y pandemig; gan addasu’r ffordd rydym yn ymateb i’r rheini mewn risg drwy ddarparu cymorth.
Er mwyn diogelu pawb, mae pob elusen wedi gorfod newid eu dulliau casglu arian.
Gan nad yw’r dulliau mwy traddodiadol o gasglu arian yn ymarferol bellach oherwydd y cyfyngiadau cadw pellter cymdeithasol, bydd elusennau’n colli miliynau o incwm o arian sy’n cael ei gasglu.
Fodd bynnag, rydym yn byw mewn byd sy’n troi’n fwy digidol, lle mae pobl wych yn canfod ffyrdd newydd ac arloesol o godi arian.
Yn lle’r digwyddiadau torfol, mae ein cefnogwyr wedi cynnal rasys hwyl rhithwir yn eu milltir sgwâr, maent wedi cynnal dosbarthiadau coginio ar-lein yn lle stondinau gwerthu cacennau mewn swyddfeydd a disgo mewn cegin yn lle gigiau elusennol mewn tafarndai.
Mae’r Her 2.6 a gynhaliwyd ledled y DU yn enghraifft dda o ymgyrch codi arian lwyddiannus dros y we – gan godi dros £11 miliwn ac ysbrydoli miloedd o bobl i godi arian i achosion da.
Ond rydym angen cynnal y momentwm i gasglu arian dros y we.
Rydym yn byw mewn cyfnod o ansicrwydd ac rydym yn dibynnu ar gymorth ein rhoddwyr i’n helpu i allu parhau i roi cymorth i’r bobl sydd mewn perygl o ddigartrefedd trwy gydol yr argyfwng hwn a thu hwnt.
Cyn dechrau arni, dylech sefydlu tudalen JustGiving.
Yna, mae gennym ffyrdd syml y gallwch chi ein cefnogi ni, fel elusen ddigartrefedd, dros y we.
Cymerwch ran yn ein hymgyrch #Ailadeiladu20 / #Rebuild20. Dewiswch her neu weithgaredd yn seiliedig ar y rhif 20, sefydlu tudalen JustGiving ac rydych yn barod amdani.
Beth am brofi gwybodaeth eich ffrindiau gyda chwis dros y we. Gallwch greu cwis eich hun neu ddefnyddio cwis sydd eisoes yn bodoli ar y we.
Beth am arwain gwers ioga ar-lein, sesiwn iaith dramor neu wers coginio.
Gnweud i’ch gêm fynd ymhellach: defnyddiwch Twitch i ffrydio eich gêm a gofyn am roddion.
Gall perfformwyr talentog ddefnyddio Facebook neu Instagram Live i roi sioe. Gallwch werthu tocynnau neu ofyn am ‘roddion bach’ dros y we os yw’r gynulleidfa’n hoffi’r hyn maent yn ei weld.
Ydych chi’n siomedig eich bod yn gorfod dathlu eich pen-blwydd yn ystod pandemig? Gallai codi arian dros Facebook eich helpu i deimlo eich bod yn gwneud rhywbeth gwerth chweil ar eich pen-blwydd drwy helpu achosion da.
