Mae gan The Wallich dri amcan craidd: cael pobl oddi ar y strydoedd; cadw pobl oddi ar y strydoedd; a chreu cyfleoedd i bobl.
Drwy allgymorth, ymyriadau cysgu allan a gwasanaethau galw heibio, rydyn ni’n ymateb ar unwaith gyda chymorth, hanfodion, cyngor a llwybrau clir allan o ddigartrefedd.
Rydyn ni’n cynnig llety â chymorth a gwasanaethau arbenigol, gan gynnwys i bobl sydd â phroblemau penodol fel defnyddio sylweddau neu iechyd meddwl gwael.
Rydyn ni’n helpu i atal digartrefedd drwy gefnogi pobl i aros yn eu cartrefi eu hunain a chynnal eu llesiant.
Drwy ddysgu, cyflogaeth, gwirfoddoli a phrosiectau creadigol, rydyn ni’n helpu pobl i feithrin sgiliau, adennill hyder ac ailgysylltu â’u cymunedau.
Cymru lle mae pobl yn sefyll gyda’i gilydd i roi diwedd ar ddigartrefedd drwy gynnig gobaith, cefnogaeth ac atebion sy’n para.
Rydyn ni’n gweithio’n ddiflino ochr yn ochr â’n staff, ein partneriaid ac – yn bwysicaf oll – y bobl rydyn ni’n eu cefnogi. Rydyn ni’n credu bod gan bawb yr hawl i gartref, yn ogystal â theimlo’n ddiogel, yn cael eu gwerthfawrogi ac yn teimlo’n gadarnhaol am eu dyfodol.
Yn ddewr – Rydyn ni’n sefyll dros yr hyn sy’n iawn, ac yn herio ein hunain a’n gilydd. Rydyn ni’n arloesi’n ddi-ofn drwy gyflwyno mentrau newydd. Mae gennym ni a defnyddwyr ein gwasanaeth y dewrder i sbarduno newid.
Yn benderfynol – Wnawn ni ddim rhoi’r gorau iddi. Fe wnawn ni barhau i ymdrechu i wneud newidiadau mawr, nid yn unig i’n helusen, ond hefyd i’r bobl rydyn ni’n eu cefnogi. Wnawn ni ddim colli angerdd na ffocws, hyd yn oed pan fydd hynny’n anodd.
Yn ddiffuant – Rydyn ni’n onest o ran ein bwriadau ac yn gweithio ar y rheng flaen gyda’r bobl sydd ein hangen ni. Rydyn ni’n cerdded ar hyd y llwybr ochr yn ochr â phobl, ac yn defnyddio profiadau bywyd cymheiriaid i lywio popeth rydyn ni’n ei wneud.
Yn drugarog – Rydyn ni’n dosturiol bob amser. Dim ots sawl gwaith mae rhywun yn dod atom am help, byddwn yn gwrando heb feirniadu, yn cydymdeimlo ac yn eu cyfarch yn garedig.
Yn gymuned – Mae pawb yn haeddu perthyn i rywle. Rydyn ni’n gwerthfawrogi partneriaeth ac yn ymdrechu i gynnwys a derbyn y bobl mae digartrefedd yn effeithio arnynt. Rydyn ni’n cefnogi ein gilydd fel teulu.
Dechreuodd stori The Wallich ym 1978
Pan gyfarfu Fred Josef a Jane Elvin yng Nghaerdydd, fe wnaethon nhw agor lloches ar gyfer 6 o bobl ifanc. Datblygodd hyn yn gyflym i fod yn Gymuned Wallich Clifford (a ysbrydolwyd gan Anton Wallich-Clifford).
Ers hynny, mae The Wallich wedi tyfu i fod yn fudiad cenedlaethol, gan ddarparu dros 100 o wasanaethau ledled Cymru a chynnig dros 400 o welyau bob nos.
Rydyn ni’n gwybod bod rhoi diwedd ar gysgu allan yn bosibl. Ond mae angen i bob un ohonom – gan weithio gyda’n gilydd gydag ymrwymiad gwirioneddol ac ewyllys wleidyddol – wneud i hyn ddigwydd.
Mae pwysau newydd yn gwthio mwy o bobl i ddigartrefedd. Mae’r argyfwng costau byw, prinder tai fforddiadwy a thoriadau i wasanaethau cyhoeddus yn gadael llawer heb unman i droi.
Mae’r galw’n cynyddu, mae adnoddau dan bwysau ac mae’n anoddach cyrraedd sefydlogrwydd.
Ond nid dyma’r dyfodol yr oedd gan ein sylfaenwyr, Jane a Fred, dan sylw – ac nid yw’n rhywbeth y dylen ni ei dderbyn.
Gyda’n gilydd, gallwn sicrhau bod gan bawb le i’w alw’n gartref
Gan sefyll gyda’n gilydd, ar draws y sector a’r tu hwnt, gallwn fynd i’r afael â’r heriau hyn yn uniongyrchol a manteisio i’r eithaf ar yr adnoddau sydd gennym.
Mae ein pwrpas yn dal yn glir: rhoi diwedd ar ddigartrefedd ac ailadeiladu bywydau.
Rydyn ni’n ymrwymo i fod yn bartner cryf y gellir ymddiried ynddo ac i ganolbwyntio ein hymdrechion ar ble y byddant yn gwneud y gwahaniaeth mwyaf.
Y Ffordd hyd at 2030 – Meysydd Ffocws Strategol The Wallich
Darllenwch ein strategaeth:
