O Weithiwr Cymorth i Brif Swyddog Gweithredol: Prif Weithredwr newydd elusen ddigartrefedd wedi dechrau ei gyrfa yn helpu pobl oedd yn cysgu allan

 

Dechreuodd gyrfa 18 mlynedd Sian Aldridge drwy gefnogi pobl ar y strydoedd. Erbyn hyn, mae elusen digartrefedd fwyaf Cymru, The Wallich, wedi ei phenodi’n Brif Swyddog Gweithredol newydd.

“Pan es i allan i redeg amser brecwast am y tro cyntaf ym Mhen-y-bont ar Ogwr flynyddoedd yn ôl, fe wnes i gwrdd â’r bobl ddigartref y byddwn i’n eu cefnogi. Ac wrth i mi gynnig coffi a chlust gyfeillgar, fe wnes i ymrwymo i wneud popeth o fewn fy ngallu i hwyluso bywyd gwell i’r rhai sy’n profi digartrefedd.“ meddai Siân.

Dechreuodd gyrfa Sian yn The Wallich yn 2008, gan ddechrau ar y rheng flaen yn y tîm cysgu allan ym Mhen-y-bont ar Ogwr, gan fynd allan i weld pobl bob bore a’u helpu oddi ar y stryd. O’r fan honno, datblygodd hi wasanaethau digartrefedd arloesol a chyd-gynhyrchu drwy swyddi fel Pennaeth Cyfranogiad a Chynnydd, Cyfarwyddwr Gweithrediadau, a Phrif Swyddog Gweithredol Dros Dro yn ei 18 mlynedd yn yr elusen.

Fel Prif Weithredwr, bydd Sian yn goruchwylio’r elusen i barhau i gefnogi dros 7,000 o bobl a darparu dros 100 o wahanol wasanaethau yn ymwneud â digartrefedd ledled Cymru.

Aeth Sian yn ei blaen, “Ers i hyn gael ei gyhoeddi i’n staff, rydw i wedi cael fy rhyfeddu gan negeseuon caredig, cefnogaeth ac anogaeth gan bobl weithgar The Wallich. Fel fi, mae llawer o bobl yn credu yn eu gwaith ac wedi bod yn rhan o’n cymuned ers nifer fawr o flynyddoedd. Rydw i’n wir yn gwerthfawrogi pob neges a phob dymuniad da oherwydd rydw i’n credu mai’r hyn sy’n gwneud y sefydliad hwn yn arbennig yw’r bobl sy’n dod i’r gwaith bob dydd gyda thosturi, ymrwymiad a phenderfyniad i wneud gwahaniaeth.“

Yn ôl ystadegau diweddaraf Llywodraeth Cymru, mae 162 o bobl yn cysgu allan ledled Cymru ac mae 10,282 o bobl yn byw mewn llety dros dro (hosteli neu lety gwely a brecwast) – gan gynnwys 2,219 o blant.

Am ei rhaglen waith ar gyfer y dyfodol, dywedodd Sian

“Mae gennym ni Brif Weinidog newydd sydd eisiau rhoi diwedd ar gysgu allan, Llywodraeth newydd yng Nghymru sydd eisiau mynd i’r afael â chostau byw – ac fel Prif Swyddog Gweithredol newydd The Wallich, fe fyddaf i’n eu dal yn atebol i wneud i hynny ddigwydd. Rhaid mynd ati.

“Byddaf i’n arwain strategaeth Rhoi Diwedd ar Ddigartrefedd The Wallich, sydd wedi canolbwyntio o’r newydd ar y bobl rydyn ni’n eu cefnogi ac ar dorri’r cylch digartrefedd. Ac wrth i ni garlamu tuag at hanner can mlwyddiant y sefydliad yn 2028, byddwn ni’n gweiddi am yr hyn rydyn ni’n gwybod sydd angen ei wneud i roi diwedd ar ddigartrefedd yng Nghymru.”

Ar ôl i Sian gael ei phenodi, dyma ddywedodd Oliver Townsend, Cadeirydd Bwrdd Ymddiriedolwyr The Wallich

“Mae gan Sian brofiad enfawr o ddarparu gwasanaethau a chymorth digartrefedd. Mae hi’n gwybod beth rydyn ni’n ei wneud y tu chwith allan, a does neb gwell i warchod ein gwerthoedd na hi. Mae ei hymrwymiad i weithio mewn partneriaeth, i ansawdd y gwasanaeth, i ddangos yr effaith ar y bobl rydyn ni’n eu cefnogi, ac i gynaliadwyedd y sefydliad yn dangos yn glir y bydd hi’n gyrru The Wallich ymlaen i gyfnod newydd cyffrous.”

Y tu allan i’r Wallich, mae Sian yn aelod balch o Fwrdd Ymddiriedolwyr Cymorth Cymru. Mae hi’n gweithio ochr yn ochr ag unigolion brwdfrydig a phrofiadol eraill o’r sector i helpu i lywodraethu’r gwaith dylanwadu pwysig a wneir gan y tîm yn Cymorth.

Pwy yw Sian Aldridge – Prif Swyddog Gweithredol newydd The Wallich?

Datblygodd gyrfa Sian yn The Wallich o ddarparu cymorth rheng flaen ar y strydoedd. Ym mis Hydref 2013, bu Sian yn rheoli rhaglen wirfoddoli defnyddwyr gwasanaeth The Wallich ledled Cymru. Ehangodd ei swydd i gynnwys cydgynhyrchu a chreu cyfleoedd i gleientiaid, gan gynnwys datblygu ffyrdd arloesol o ymgysylltu â phobl sydd wedi profi digartrefedd ac i’w cynnwys.

Yn ddiweddarach, arloesodd hi swydd newydd, sef Pennaeth Cyfranogiad a Chynnydd. Yno, bu’n goruchwylio’r holl brosiectau yn ymwneud â sgiliau, cyflogadwyedd a llesiant. Mae hi’n frwd dros helpu pobl i ymgysylltu â’u cymunedau drwy dreftadaeth, y celfyddydau, diwylliant a chwaraeon.

Penodwyd Sian yn Ddirprwy Gyfarwyddwr Gweithrediadau yn 2019, lle parhaodd i arwain y gwaith o ddarparu gwasanaethau creadigol ac arloesol. Flwyddyn yn ddiweddarach, daeth yn Gyfarwyddwr Gweithrediadau, gan oruchwylio holl weithrediadau’r elusen ledled Cymru.

Dros ei 18 mlynedd yn The Wallich, mae Sian wedi bod yn rhan hollbwysig o daith The Wallich i fod yn sefydliad sy’n ystyriol o drawma a PIE (Amgylchedd sy’n Ystyriol o Gyflwr Seicolegol). Hi hefyd oedd yn gyfrifol am ein gwaith ym maes lleihau niwed o ddefnydd o gyffuriau ac alcohol, cynhwysiant iechyd a’n cerbydau allgymorth symudol.

Mae Sian wedi arloesi partneriaethau i ddod â phrosiectau cyffrous i Gymru, e.e. Côr Heb Enw, arddangosfa Penderfyniad Pwy gydag Amgueddfa Cymru Caerdydd, a Chwpan Pêl-droed Digartref y Byd a gynhaliwyd yng Nghaerdydd yn 2019.

Mae hi wedi ymgymryd â swydd Prif Swyddog Gweithredol Dros Dro am ddau gyfnod ac erbyn hyn, dyma hi’n camu i’r swydd yn barhaol.

 

Helpu pobl sy’n profi digartrefedd ar hyd a lled Cymru